Ədalətli məhkəmə qərarıyla şəxsin cəzası yüngülləşdirildi

Ədalətli məhkəmə qərarıyla şəxsin cəzası yüngülləşdirildi.

Hazırda narkotik vasitələrin əldə edilməsi ilə əlaqədar cinayət işləri olduqca aktualdır. Bu blog yazımızda da bu tip cinayət işi üzrə vətəndaşın xeyrinə dəyişdirilən qərarlardan birini nəzərdən keçirib məsələ ilə bağlı Ali Məhkəmənin mövqeyini izah edəcəyik. Ədalətli məhkəmə qərarı ilə şəxsin cəzası yüngülləşdirildi

Belə ki, şəxsin əməli Bakı Ağır Cinayətlər Məhkəməsinin hökmü ilə narkotik maddələrin satış məqsədilə əldə olunması(CM 234.4.1 və 234.4.3) kimi qiymətləndirilmişdir. Bununla da şəxs 5 il azadlıqdan məhrumetmə cəzasına məhkum edilmişdir. Apellyasiya Məhkəməsi isə haqlı olaraq bu əməlin narkotik maddələrin satışı deyil, satış məqsədi olmadan əldə olunması(CM 234.1) olduğunu qərarında əsaslandırmışdır.  Şəxsə 2 il 6 ay müddətə azadlıqdan məhrum etmə cəzası təyin etmiş və Ali Məhkəmə də həmin qərarı qüvvədə saxlamışdır.

İşin hallarına görə, vətəndaş başqa şəxslə görüşüb qanunsuz olaraq 30 manat pul müqabilində 1 bükümdə külli miqdarda heroini və 30 manat pul müqabilində 1 bükümdə külli miqdarda metamfetamini əldə etmişdir. Polis əməkdaşları tərəfindən saxlanılmış, şübhəli şəxs qismində tutulduqdan sonra üzərinə axtarış keçirilərkən həmin narkotik vasitələr aşkar edilmişdir.

Ağır Cinayətlər Məhkəməsinin hökmü ilə şəxs 5 il müddətə azadlıqdan məhrum etmə cəzasına məhkum edilmişdir.

Vətəndaş qərardan narazı qalmış və verdiyi apellyasiya şikayəti təmin olunmuşdur.

Belə ki, şəxsin törətdiyi əmələ CM  234.1-ci maddəsi ilə 2 il 6 ay müddətə azadlıqdan məhrum etmə cəzasının təyin olunması qərara alınmışdır.

Apellyasiya Məhkəməsi qərarında bildirir ki, vətəndaşa qarşı narkotik maddə və vasitələrin satışı(ağırlaşdırıcı tərkibdə) ilə əlaqədar cinayətin törədilməsi ilə bağlı ittiham irəli sürülsə də, nə məhkəməyədək, nə də ki məhkəmə baxışı dövründə aşağıdakıları təsdiqləyən hər hansı bir sübut əldə edilməmişdir:

• onun narkotik vasitələrin satışı ilə məşğul olmasını;
• bununla bağlı hər hansı şəxslə danışıq aparmasını;
• bu barədə sövdələşməsini;
• müştərilərdən narkotik vasitələrin dövriyyəsi ilə bağlı sifarişlərin alınmasını;
• həmin sifarişləri icra etməsini;
• müştərilər çevrəsinə malik olmasını.

Apellyasiya Məhkəməsinin qərarından prokurorluq  kassasiya protesti vermiş, lakin Ali Məhkəmə də Apellyasiya Məhkəməsinin qərarını dəyişdirmədən saxlamışdır.

Ali Məhkəmə öz mövqeyini əsaslandırarkən bir çox maraqlı arqumentlərə, o cümlədən Avropa Məhkəməsi qərarlarına istinad etmişdir. Onlardan bəzilərini diqqətinizə çatdırırıq:

İlqar Məmmədov Azərbaycana qarşı işdə Avropa Məhkəməsi xüsusilə vurğulamışdır. Belə ki, Cinayət işləri ilə əlaqədar Konvensiyanın 6-cı maddəsinə əsasən baxılan məsələlərdə sübutetmə yükü ittiham tərəfinin üzərindədir. Hər hansı mövcud olan şübhə təqsirləndirilən şəxsin vəziyyətini yaxşılaşdıran hal kimi nəzərə alınmalıdır.

“Narkotik vasitələrin, psixotrop maddələrin və ya onların prekursorlarının qanunsuz dövriyyəsinə dair cinayət işləri üzrə məhkəmə təcrübəsi haqqında” Azərbaycan Respublikası Ali Məhkəməsi Plenumunun Qərarında qeyd olunur.

Təqsirkarın  narkotik vasitələri satmaq niyyətində olması müəyyən edilərkən başqa sübutlarla və narkotik vasitələrin miqdarı ilə yanaşı, istehlakçı ilə əvvəlcədən razılıq əldə edilmişdir. Eyni zamanda narkotik vasitənin çəkilib xırda bağlamalara bükülməsi, onların hazırlanması üçün avadanlığın olması və işin digər halları nəzərə alınmalıdır,

İbrahimov Məmmədov Azərbaycana qarşı işdə Avropa Məhkəməsi bildirir ki, şəxs eləcə də narkotik maddələrin satışında ittiham edilirsə, əlavə sübutların təqdim edilməsi zəruridir. Bu zaman, məsələn, nağd pul, narkotik maddəni təchiz etmiş şəxslər və ya potensial alıcılar haqqında məlumatlar, tərəzi, qablaşdırma materialları və digər əczaçılıq vasitələrinin aşkar edilməsi əlavə sübut kimi təqdim olunmalıdır.

Narkotik maddələrin satışını təsdiq edən ən mühüm və danılmaz sübut növü kimi “nəzarət qaydasında mal alınması” qəbul edilmişdir. Kuzmina və Digərləri Rusiyaya qarşı işində Avropa Məhkəməsi hətta bu halda belə tələb edir ki, əməliyyat tədbirini həyata keçirən orqan  əsaslı səbəblərin olduğunu nümayiş etdirmək imkanına malik olsun. Xüsusilə, şübhəli şəxsin cinayətin törədilməsi istiqamətində artıq müəyyən addımlar atdığını təsdiqləyən və əldəetmə mənbəsi sonrakı mərhələdə yoxlanıla bilən konkret və obyektiv məlumatların mövcudluğu tələb edilir.

Beləliklə, narkotik vasitələrin satış və ya şəxsi istifadə məqsədilə əldə olunması əmələ qiymət verilərkən xüsusi əhəmiyyət kəsb edir. Bu məqsədin sübuta yetirilməsi məhkəmə qərarında əsaslandırılmış şəkildə göstərilməlidir. Əks halda hüququ pozulmuş vətəndaşlar qərarı yuxarı məhkəmədə mübahisələndirərək işə düzgün baxılmasını tələb edə bilər. Nəticədə ədalətli məhkəmə qərarıyla şəxsin cəzası yüngülləşdirildi

Vəkil Pərviz Məmmədov haqqında daha ətraflı məlumat üçün: https://parvizmammadov.az/vekil-haqqinda/